Y
የከተማው ፐብሊክ ሰርቪስና የሰው ሀብት ልማት ተቋም በ2016 ዓ.ም የተግባር ግብ ስምምነት ዙሪያ ለጽ/ቤት ኃላፊዎች ግንዛቤ ሰጠ!
ታህሳስ 7/2016 [ወራቤ ኮሙኒኬሽን] የወራቤ ከተማ አስተዳደር ፐብሊክ ሰርቪስና የሰው ሀብት ልማት ጽ/ቤት በ2016 ዓ.ም የተግባር ግብ ስምምነት ዙሪያ ለተቋማት ኃላፊዎች ግንዛቤ ሰጥቷል፡፡
መድረኩን የመሩት የወራቤ ከተማ አስተዳደር የመንግስት ዋና ተጠሪ አቶ አብዱልከሪም ሸሳይድ ጠንካራ ተቋም በመፍጠር ረገድ የአመራሩ ሚና የጎላ መሆኑን ገልጸው ተቋማትን በዕውቀት ለመምራትና ለተገልጋዩ ህብረተሰብ ተገቢውን አገልግሎት ለመስጠት በየጊዜው የሚሰጡ የአቅም ግንባታ ስልጠናዎችን ወደ ተግባር መቀየር እንደሚያስፈልግ አስገንዝበዋል፡፡
የከተማ አስተዳደሩ ፐብሊክ ሰርቪስና የሰው ሀብት ልማት ጽ/ቤት ኃላፊ የሆኑት ወ/ሮ መህቡባ ስራጅ እንደተናገሩት በበጀት ዓመቱ በተቋም ደረጃ ከሪፎርም ስራዎች አንጻር በመልካም አስተዳደር፣ በሰው ሀብት ልማት፣ በዘርፈ-ብዙ ተግባራትና በስነ-ምግባር ዙሪያ በተቀመጡ ነጥቦች ላይ ሰፊ ማብራሪያ ሰጥተዋል፡፡
በቀጣይ በድጋፍና ክትትል ወቅት በተገኙ ክፍተቶች ላይ ከአሰራርና መመሪያ አንጻር የሚገኙ ጉድለቶችን ለማረም ለአመራሩ፣ ለሴክተር ባለሙያዎችና ለቀበሌ መዋቅሮች የአቅም ግንባታ ስልጠና እንደሚሰጥ ኃላፊዋ ተናግረዋል፡፡
ከዚህ በተጨማሪም የፐብሊክ ሰርቪስ ተቋሙ የአሰልጣኞች ስልጠና እንደሚሰጥ የተጠቆመ ሲሆን በመድረኩ ለተነሱ ጥያቄዎችና አስተያየቶች ምላሽና ማብራሪያ በመስጠት የዕለቱ ፕሮግራም ተጠናቋል፡፡
የወራቤ ከተማ አስተዳደር ብልፅግና ፓርቲ “ከእዳ ወደ ምንዳ” በሚል ርዕስ የተዘጋጀውን የአቅም ግንባታ ስልጠና ለአባላት ለመስጠት ለጠቅላላ አመራሩ ኦረንቴሽን ተሰጠ!!
ታህሳስ 7/2016 [ወራቤ ኮሙኒኬሽን] ስልጠናው የሚሰጠው አመራሩ በአራት ዙሮች ተከፋፍሎ የሰለጠናቸውን የተለያዩ አጀንዳዎች ለፓርቲዉ አባላትና ደጋፊ ለመስጠት እደሆነም ነው የተገለፀው
ኦረንቴሽኑን የሰጡት የፓርቲ ፅ/ቤት ሀላፊዉ አቶ አ/ከሪም ሸ/ሳይድ እንደገለፁት ስልጠናው በሁሉም አመራር ቁጭትና መነሳሳት የፈጠረ ሲሆን በቀጣይ ለምናከናውናቸው ስራዎች አጋዥ በሚሆን መልኩ ለአባላቱ ስልጠናውን መስጠት እንደሚያስፈልግም ነው የገለፁት ።
ስልጠናው የሚሰጠው በተለያዩ ግንባር ማለትም በነዋሪ፣ በእንተርፕራይዝ፣ በሲቪል ሰርቫንት … ወዘተ ተከፋፍሎ እንደሆነም ሀላፊው አብራርተዋል።
ሀላፊው አያይዘውም ስልጠናውን በአግባቡ በመከታተልና አስፈላጊውን መረጃ በመያዝ ለቀጣይ በተቋም ለምንሰራዉ ስራ ብቻ ሳይሆን በግል ህይወታችንም ለውጥ ልናመጣበት በምንችል መልኩ ስንቅ መያዝ እንደሚያስፈልግ ተናግረዋል።
በመጨረሻም ስልጠናው በተቀመጠለት የጊዜ ገደብ ለመስጠት አስፈላጊውን ቅድመ ዝግጅት ማድረግ እንደሚያስፈልግ ከከተማው ጠቅላላ አመራር መግባባት ተፈጥሮ መድረኩ ተጠናቋል።
በሴቶች ላይ የሚደርሱ አካላዊና ስነ-ልቦናዊ ጉዳቶችን በመከላከል የኢኮኖሚ ተጠቃሚነታቸውን ማረጋገጥ እንደሚገባ ተገለጸ!
ታህሳስ 5/2016 [ወራቤ ኮሙኒኬሽን] የወራቤ ከተማ አስተዳደር ሴቶች እና ህጻናት ጉዳዮች ጽ/ቤት በሴቶች ልማት ቡድን አደረጃጀት እና በተለያዩ ርዕሰ ጉዳዮች ላይ ከሚመለከታቸው ባለድርሻ አካላት ጋር መክሯል።
ተቋሙ በቅርብ ወቅት የሴቶች የልማት ቡድን አደራጅቶ ወደ ስራ ለማስገባት የሚያስችል ከባለድርሻ አካላት የንቅናቄ መድረክ ማካሄዱ ይታወሳል። ታዲያ በአዲስ መልኩ የተደራጀውን የሴቶች የልማት ቡድን ወደ ተግባር በመቀየር የሴቶችን ኢኮኖሚያዊ ተጠቃሚነት ማሳደግ ይገባል ነዉ የተባለው።
በዕለቱም አዲሱን የሴቶች ልማት ቡድን አደረጃጀት ማጽደቅ፣ ከጊዜ ወደ ጊዜ እየተበራከተ የመጣውን የጋብቻ ፍቺን ለመቀነስ እንዲሁም ልመናን በጋራ መከላከል በሚቻልባቸው ጉዳዮች ዙሪያ ሰፊ ዉይይት ተደርጓል።
የሴቶችን አደረጃጀት ማጠናከር የኢኮኖሚ ተጠቃሚነታቸውን ከማረጋገጥ ባሻገር የሚደርስባቸውን አሉታዊ ጫና በመከላከል ረገድም ወሳኝ ሚና እንዳለዉ ተገልጿል።
በከተማው ከወትሮው በተለየና ባልተለመደ መልኩ የማህበረሰቡን ባህል የማይመጥን የልመና ልማድ እየተስተዋለ መሆኑ የተገለጸ ሲሆን ይህንኑ ተግባር በጋራ በመከላከል ዜጎች በላባቸዉ ለፍተዉና ጥረዉ እንዲበለጽጉ ማድረግ ይገባል ተብሏል።
በማህበረሰቡ ዉስጥ የኑሮ ጫናው እየጨመረ መምጣቱ እንዲሁም ሴቶች በተለያዩ ዘርፎች ዉጤታማ አለመሆን ለፍቺ መበራከት እንደ ምክንያት የተጠቆመ ሲሆን ፍቺና መሰል ጉዳዮችን አስቀድሞ መከላከልና
ሴቶችን በተለያዩ የስራ መስኮች ፍሬያማ እንዲሆኑ በመስራት የኢኮኖሚ አቅማቸዉን ማሳደግ እንደሚያስፈልግ ተመላክቷል።
በሀገሪቱ ብሎም በከተማው ከእምነት እና ከባህል ባፈነገጠ መልኩ የሚፈጸሙ ጎጂ ልማዳዊ ድርጊቶች ህዝቡ ዘንድ ማህበራዊ ቀዉስ የሚያስከትሉ በመሆናቸው መሰል ድርጊቶችን በጋራ ማስቆም እንደሚገባ ተጠቅሷል።
በህገ-ወጥ መንገድ የሚደረግ የሰዎች ዝውውርን ለመከላከል ተቀናጅቶ መስራት የሚጠይቅ መሆኑም ተብራርቷል።
ማህበረሰቡ ዘንድ ሊፈጠሩ የሚችሉ ግጭቶችንና አለመግባባቶችን ለመፍታት የቆየ ልማዳችን የሆነዉን ባህላዊ የግጭት አፈታት ስርዓትን ማጠናከር እንደሚገባም ተጠይቋል።
ርዕሰ መስተዳድር እንዳሻዉ ጣሰዉ ስራቸውን በይፋ ጀመሩ
የማዕከላዊ ኢትዮጵያ ክልላዊ መንግስት ርዕሰ መስተዳድር አቶ እንዳሻው ጣሰው በክልሉ ርዕሰ መዲና ሆሳዕና ዛሬ ስራቸውን በይፋ ጀምረዋል።
ርዕስ መስተዳድሩ እስከአሁን ቴክኖሎጂዎችን ተጠቅመን ስራዎች እየተሰሩ ነበር፣ የመቶ ቀን እቅድ አውጥተን ስራዎች እየተሰሩ ይገኛል ብለዋል።
ጊዜው የስራ ነው ያሉት ርዕሰ መስተዳድሩ አርሶ አደሩ፣ ነጋዴው፣ አመራሩ፣ ባለሙያው እና ሌሎችም በተለየ መልኩ ሰርተን የሀገራችንን ሁለንተናዊ ለውጥ ማረጋገጥ ይኖርብናል ሲሉ ገልጸዋል።
በክልሉ መቀመጫ በሆኑ ሁሉም ከተሞች ላይ አመርቂ ስራ በመስራት ታሪክ አስቀምጠን ማለፍ አለብን ብለዋል።
በሀገራችን ብሎም በክልላችን የተለያዩ ችግሮችና ግጭቶችን አይተን አልፈናል ከአሁን በኋላ ወደ ሙሉ ስራ በመግባት ተጨባጭ ለውጥ ማምጣት አለብን ብለዋል።
የሀዲያ ዞን ዋና አስተዳዳሪ አቶ አብርሃም መጫ ርዕሰ መስተዳድሩን እንኳን ደህና መጡ ካሉ በኋላ የዞኑ አስተዳደር በማንኛም ጉዳይ ከክልልሉ አስተዳደር ጋር በቅርበት እንደሚሰራ ገልፀው ፤ መልካም የስራ ዘመን ተመኝተዋል።
ግብረ-ኃይሉ ያከናወናቸው ተግባራትን ከጠቅላላ አመራሩ ጋር ገመገመ!
ነሐሴ 9/2015 [ወራቤ ኮሙኒኬሽን] አዲሱ የማዕከላዊ ኢትዮጵያ ክልል መመስረትን ተከትሎ የተወሰኑ ተቋማት መቀመጫቸዉን ወራቤ ከተማ ላይ አድርገዋል።
ከዚህ ጋር ተያይዞ ወደ ከተማዋ የሚመጡ እንግዶችን እና ተቋማትን ተቀብሎ ሊያስተናግድ የሚችል የተለያዩ የቅድመ ዝግጅት ስራዎችን በተገቢዉ የሚያሳልጥ ግብረ-ኃይል ተቋቁሞ በሥራ ላይ ይገኛል።
ከተማዋን በሁሉም ዘርፍ ዝግጁነቷን ለማጠናከርና ቀሪ ሥራዎችን ለማፋጠን ተቋቁሞ እንቅስቃሴ እያደረገ ያለው ግብረ-ኃይል በእስካሁን ቆይታዉ ያከናወናቸዉ ተግባራትን ከከተማው ጠቅላላ አመራሮች ጋር በዛሬዉ ዕለት ገምግሟል።
በግምገማው መድረክ ከጽዳትና ዉበት ስራ፣ ከምግብ ቤቶችና ሆቴሎች የጥራትና የዋጋ ቁጥጥር፣ የሰላምና የፀጥታ ስራዎች፣ የተለያዩ የክራይ ቤቶችና የቢሮ ቦታዎችን ከማመቻቸት አንስቶ ግብረ-ኃይሉ ከተቋቋመ ጀምሮ ያከናወናቸዉ ስራዎች እንዲሁም ቀጣይ የሚሰሩ ቀሪ ተግባራት በዝርዝር ተፈትሸዋል።
መድረኩን የወራቤ ከተማ አስተዳደር ከንቲባ አቶ ያሲን ከሊል እና የከተማ አስተዳደሩ የመንግስት ዋና ተጠሪ የሆኑት አቶ አብዱልከሪም ሸሳይድ በጋራ የመሩት ሲሆን አሁናዊ ነባራዊ ሁኔታን ከግንዛቤ በማስገባት በከተማዉ የጽዳትና ዉበት ስራን ጨምሮ ከወትሮ በተለየ ሁኔታ ሁሉም ትብብር በማድረግ ቀሪ ተግባራትን ማከናወን እንደሚገባ አጽዕኖት ሰጥተዋል።
በተለይም የከተማዋን ጽዳትና ውበት በማስጠበቅ ረገድ ህብረተሰቡ ትብብር ማድረግ እንዳለበት መልዕክት ተላልፏል።
ለ2016 በጀት ዓመት የ1ኛ ዙር የስነ-ህዝብ የምክር ቤት ጉባኤ እና የአለም የስነ-ህዝብ ቀን የምክክር መድረክ በወራቤ ከተማ ተካሄደ!
ነሐሴ 10/2015 [ወራቤ ኮሙኒኬሽን] የወራቤ ከተማ አስተዳደር ፕላን ጽ/ቤት የ2016 በጀት ዓመት የ1ኛ ዙር የስነ-ህዝብ የምክር ቤት ጉባኤ እና የአለም የስነ-ህዝብ ቀን የምክክር መድረክ አካሂዷል።
በመድረኩም የስነ-ህዝብ የሴክተር መስሪያቤቶች የ10 ዓመት ስትራቴጂክ ዕቅድ በጽ/ቤቱ ሃላፊ በአቶ አክመል አብደላ ቀርቦ ሰፊ ዉይይት ተደርጎበታል።
ወጣቶች አልባሌ ቦታ ከመዋል እና ግዜያቸዉንና ሰዓታቸዉን በልተገባ ሁኔታ እንዳያዊሉት እንዲሁም በተለያዩ ከባህል ያፈነገጡ መጤ ብሂል እንዳይጠቁ በተለይም በአሁኑ ሰዓት ዘመን አመጣሽ የባህል ወረርሽኝ ህይወታቸዉን እንዳያበላሽ ተቋማት በትኩረት መስራት እንደለባቸዉ ተመላክቷል።
በሀገራችን በከፍተኛ ሁኔታ እየተበራከተ የመጣዉ እንዲሁም በዞኖች ጭምር የሚስተዋለውን ህገ-ወጥ የህጻናት ዝዉዉር እና የዜጎች ፍልሰት ከማህበረሰቡ ጋር በመሆን በጋራ መከላከል እንደሚገባ ተብራርቷል
የከተማ የህዝብ ዕድገት ምጣኔ ከእኮኖሚና ማህበራዊ እድገት ጋር በማጣጣም የዜጎችን የኑሮ ደረጃ ማሻሻል እንደሚገባና በተለይም ከቅርብ ግዜ ወዲህ አመርቂ ዉጤት እየተመዘገበበት ያለዉ የሌማት ቱሩፋት ስራዎችን በማጠናከር የህብረተሰቡን የምግብ ዋስትናን ማረጋገጥ ይገባል ተብሏል።
በመጨረሻም በከተማዉ ለሚገኙ አቅመ ደካማ ቤተሰቦች የምግብ ቁሳቁስ ድጋፍ የተደረገላቸው ስሆን እንዲሁም የጉባኤዉ ተሳታፊች በከተማ አስተዳደሩ መናሀሪያ አካባቢ የጽዳት ዘመቻ በማካሄድ የዕለቱ ዝግጅት ተጠናቋል።
ፓርቲው በወራቤ ከተማ በሚገኙ ተቋማት ላይ ያደረገውን የኢንስፔክሽን ግብረ-መልስ ከከተማው አመራሮች ጋር ገመገመ!
ግንቦት 25/2015 [ወ.ኮ] የወራቤ ከተማ አስተዳደር ብልጽግና ፓርቲ ጽ/ቤት የተቋሙን የአስር ወር የተግባር አፈጻጸም እና የተቋማት የ90 ቀን ዕቅድ ክንውን ላይ ያደረገውን የኢንስፔክሽን ግብረ-መልስ ከከተማው የአመራር አካላት ጋር ገምግሟል።
የከተማው ሴክተር መስሪያቤቶች የ90 ቀን ዕቅድ ክንውን እና የህዋስ ውይይትን አስመልክቶ የተዘጋጀ ዝርዝር የግብረ-መልስ ሪፖርት ቀርቦ ምክክር ተደርጎበታል።
በመድረኩ የተገኙት የወራቤ ከተማ አስተዳደር ከንቲባ አቶ ያሲን ከሊል እንደተናገሩት የመንግስትና ፓርቲውን እንዲሁም ሌሎች አደረጃጀቶችን በማጠናከር ለሁለንተናዊ ለውጥ መትጋት እንደሚገባ አብራርተዋል፡፡
በተቋማት የሚስተዋለውን የተግባር ጉድለት እና የውይይት መንጠባጠቦችን በማረም ወደተግባር መግባት እንደሚገባ ከንቲባው መክረዋል።
የወራቤ ከተማ አስተዳደር ብልጽግና ፓርቲ ጽ/ቤት ኃላፊ አቶ አብዱልከሪም ሸሳይድ እንዳሉትም የመሰረታዊ ፓርቲ አደረጃጀቶችን በማጠናከርና የብልጽግና ጉዞን አጠናክሮ በማስቀጠል ሁለንተናዊ ተጠቃሚነትን ማረጋገጥ እንደሚገባ አሳስበዋል።
የፓርቲውን ዓላማና ግቡን በተገቢው በመገንዘብ ማህበራዊ፣ ኢኮኖሚያዊና ፖለቲካዊ ፋይዳው እንዲረጋገጥ ከአመራሩ ጀምሮ ሁሉም አባል ኃላፊነቱን ሊወጣ ይገባል ሲሉ አቶ አብዱልከሪም ሸሳይድ ተናግረዋል።
አመራሮቹ በሰጡት አስተያየትም የፓርቲውን ደንብና አሰራርን በመከተል ፓርቲው ጠንካራ እንዲሆን በማድረግ መንግሥት ያስቀመጣቸው ሁል-አቀፍ የልማት፣ የዴሞክራሲና ሌሎች ስራዎችንም በተሻለ መልኩ መፈጸም ያስፈልጋል ብለዋል።
ከተማ አቀፍ የህዝብ የምክክር መድረክ በወራቤ ከተማ ተካሄደ!
ግንቦት 19/2015 [ወራቤ ኮሙኒኬሽን] ከተማ አቀፍ የህዝብ የምክክር መድረክ በወራቤ ከተማ አስተዳደር በዛሬው ዕለት ተካሂዷል።
በከተማው በመንግስትና በህብረተሰቡ ተሳትፎ የተሰሩና በመከናወን ላይ ያሉ የተለያዩ የልማት ስራዎችን የሚያሳይ ዘጋቢ ፊልምና ጽሁፍ ቀርቦ ተወያይተውበታል።
የምክክር መድረኩ በከተማው በከፍተኛ ወጪ የተገነቡ ፕሮጀክቶችን ከብልሽት ለመጠበቅ እንዲሁም በቀጣይ ሊፈቱ በሚገባቸዉ የልማት ስራዎች ላይ ከማህበረሰቡ ጋር መግባባት ለመፍጠር ያለመ እንደሆነም ነው የተገለጸው።
የምክክር መድረኩን የመሩት የወራቤ ከተማ አስተደደር ከንቲባ አቶ ያሲን ከሊል ባለፉት ዓመታት በከተማ አስተዳደሩ የማህበረሰቡን የልማትና የመልካም አስተዳደር ጥያቄዎችን ለመፍታት መጠነ ሰፊ ጥረት መደረጉን ገልጸዉ በቀጣይም የህብረተሰቡን ተሳትፎ በማሳደግ ተጨማሪ የልማት ስራዎች መሰራት እንዳለባቸው ተናግረዋል።
በከተማዉ የተጀመሩ ትላልቅ ፕሮጀክቶች በተያዘላቸው የጊዜ ገደብ ከማጠናቀቅ አንጻር ዉስንነት መኖሩን የተናገሩት የከተማ አስተዳደሩ የመንግስት ዋና ተጠሪ አቶ አብዱልከሪም ሸሳይድ በመከናወን ላይ ያሉ የተለያዩ የልማት ስራዎች በወቅቱ እንዲጠናቀቁ ሁሉም ባለድርሻ አካል ርብርብ ማድረግ እንዳለበት አስገንዝበዋል።
ማህበረሰቡ ዘንድ በዋናነት ከሚነሱ የዉሃ፣ የመንገድና የመብራት እንዲሁም በፕሮጀክቶች ላይ የሚታየዉ የጥራት ጉድለት እና የክትትልና ድጋፍ ማነስ፣ በአንዳንድ አካባቢዎች የመንገድ ዳር መብራት አለመኖር ለወንጀልና ስርቆት ምቹ መሆኑ፣ የአፈር ማዳበሪያ አቅርቦት ችግር፣ ስለኑሮ ዉድነትና መሰል ጉዳዮች በመድረኩ በስፋት ተነስተዋል።
በመንግስት ከሚሰሩ የልማት ስራዎች ባሻገር ማህበረሰቡን በተለያዩ የመሰረተ ልማት ተግባራት ላይ በማሳተፍ ቀሪ ልማቶች መሰራት እንዳለባቸዉና ለተሰሩ ፕሮጀክቶችም በሃላፊነት ተገቢዉ ጥበቃ እንዲደረግ ተጠይቋል።
ዘጠነኛው ዙር የመምህራን እና የፈጠራ ስራዎች ሲምፖዚየምና ኤግዚቢሽን ቀን ተከበረ !!
ግንቦት 18/2015 [ወ.ኮ] የወራቤ ከተማ አስተዳደር ትምህርት ጽ/ቤት የ2015 ዓ.ም ዘጠነኛ ዙር የመምህራን እና የፈጠራ ስራዎች ሲምፖዚየምና ኤግዚቢሽን ቀን አክብሯል።
በኤግዚቢሽኑ በሁሉም ክላስተር ትምህርት ቤቶች የተሰሩ የፈጠራ ውጤቶች እንዲሁም በመምህራንና በተማሪዎች የተሰሩ የፈጠራ ስራዎች ቀርበው ተጎብኝተዋል።
በዕለቱም ፕሮግራሙን መሰረት ያደረገ ሰነድ ቀርቦ ሰፊ ውይይት ተደርጎበታል።
መድረኩን የመሩት የወራቤ ከተማ አስተዳዳር ትምህርት ጽ/ቤት ኃላፊ አቶ በህረዲን ሀሰን እንዳሉት የፈጠራ ስራዎች የማህበረሰቡን ችግር የሚቀርፉ በመሆኑ የሚመለከተው አካል ለዘርፉ ልዩ ትኩረት ሰጥቶ ሊሰራ እንደሚገባ አስገንዝበዋል።
የፈጠራ ስራ ባለቤቶችን በሀሳብ፣ በቁሳቁስና በገንዘብ መደገፍና ማበረታታት እንደሚያስፈልግ አቶ በህረዲን ሀሰን አስረድተዋል።
የተለያዩ የፈጠራ ስራዎችን የሚያካሂዱ መምህራንና ተማሪዎችን መደገፍ ከሁሉም ይጠበቃል ያሉት ተሳታፊዎቹ ይህም የማህበረሰቡን ችግሮች ለመፍታት የጎላ አስተዋጽኦ እንዳለው ተናግረዋል።
ለፈጠራ ስራዎች የሚሆኑ ግብአቶችን በሁሉም ትምህርት ቤቶች ማሟላት እንደሚገባ የተገለጸ ሲሆን በቀጣይም በሀገር አቀፍ ደረጃ ተወዳዳሪ የፈጠራ ስራ ለማቅረብ ሁሉም ባለድርሻ አካል ትኩረት ሰጥቶ መስራት እንዳለበት ተመላክቷል።
በዕለቱም ፕሮግራሙን መሰረት ያደረገ ሰነድ ቀርቦ ሰፊ ውይይት ተደርጎበታል።
በተካሄደው የፈጠራ ስራዎች ሲምፖዚየምና ኤግዚቢሽን 107 የፈጠራ ስራዎች ለዕይታ የቀረቡ ሲሆን በዚህም የተሻለ አፈጻጻም ላስመዘገቡ መምህራንና ልዩ የፈጠራ ስራ ለሰሩ ተማሪዎች የማበረታቻ ሽልማት ተበርክቶላቸዋል።
